Қалқаман Сарин – ақын, қоғам қайраткері, тележүргізуші. Ол 1978 жылы Шығыс Қазақстан облысы, Абай ауданы, Арқат ауылында дүниеге келген.

1994 жылы орта мектепті тәмамдап, 1998 жылы Л.Н. Гумилев атындағы Еуразия ұлттық университетінің тарих факультетін бітірді. Кейін осы оқу орнында білімін жалғастырып, 2012–2014 жылдары тарих ғылымдарының магистрі дәрежесін иеленді. Еңбек жолын жоғары білім саласында бастап, 1998–2008 жылдары ҚазҰМА-да әлеуметтік-гуманитарлық пәндер кафедрасының оқытушысы қызметін атқарды.

2008 жылдан бастап Л.Н. Гумилев атындағы Еуразия ұлттық университетінің Қазақстан тарихы кафедрасының аға оқытушысы болып еңбек етті. 2014–2015 жылдары аталған университет ректорының кеңесшісі қызметін атқарды. Қалқаман Сарин 2013–2015 жылдары «Астана» телеарнасында «Кеш емес» саяси-әлеуметтік ток-шоудың жүргізушісі, ал 2016 жылдан бастап «Қазақстан» ұлттық арнасындағы «Ой-толғау» танымдық бағдарламасының жүргізушісі болды.

Сондай-ақ 2016 жылдан бері ҚР «Атамекен» Ұлттық кәсіпкерлер палатасы жанынан құрылған «Атамекен» пікірсайыс клубының жетекшісі қызметін атқарып келеді. Ол 2012 жылдан Қазақстан Жазушылар одағының мүшесі, бірқатар әдеби және қоғамдық марапаттардың иегері. Ақынның шығармашылығы поэзия мен ән мәтіндері арқылы кеңінен танылған. Оның өлеңдеріне жазылған әндер ел арасына кең тараған.

Қалқаман Сарин – «Арманымның бейнесі» (2011), «Құс жолындағы керуен» (2014) жыр жинақтарының, сондай-ақ «Жібек сезім – Жүрек сөзім» (2011) атты авторлық үнтаспа жинағының авторы. 2011 жылғы 2 қарашада Астана қаласындағы Конгресс-холл сарайында Қазақстан Республикасы Тәуелсіздігінің 20 жылдығына арналған «Арманымның бейнесі» атты әдеби-сазды шығармашылық кеші өтті.

Қалқаман Сарин – қазіргі қазақ поэзиясында өзіндік үні бар, азаматтық тақырып пен лириканы шебер ұштастыра білген қаламгер.