НҰБАҒИЛА ЧИНКЕБАЕВА

Чинкебаева Нұрбағила 1952 жылы 2 қазан күні Шығыс Қазақстан облысы Көкпекті ауданына қарасты Үлгілі Малшы ауылында дүниеге келген. Өнерге деген бейімділігі мен шығармашылыққа құштарлығы ерте байқалған ол 1974 жылы Жамбыл қаласындағы музыкалық училищеге режиссер мамандығы бойынша оқуға түсіп, 1977 жылы аталмыш оқу орнын қызыл дипломмен абыроймен тәмамдады. Кәсіби білімін одан әрі жетілдіру мақсатында Семей қаласындағы Н.К. Крупская атындағы педагогикалық институтта оқуын жалғастырып, өнер мен педагогиканы ұштастырған білікті маман ретінде қалыптасты.

Еңбек жолын театр саласымен тығыз байланыстырған Нұрбағила Чинкебаева 1978 жылдың 8 ақпанынан бастап Семей қаласындағы Абай атындағы қазақ музыкалық драма театрында труппа меңгерушісі қызметін атқарып келеді. Қырық жылдан астам уақыт бойы бір театрда табан аудармай еңбек етуі оның кәсібіне деген адалдығы мен жауапкершілігінің айқын дәлелі.

Өнер саласындағы ұзақ жылдарғы жемісті еңбегі елеусіз қалған жоқ. Театр өнерінің дамуына қосқан зор үлесі үшін 2004 жылы Нұрбағила Чинкебаеваға «Қазақстан Республикасының Мәдениет қайраткері» құрметті атағы берілді. 2013 жылы Халықаралық театр күніне орай Өскемен қаласына арнайы шақырылып, Шығыс Қазақстан облысы Мәдениет басқармасының арнайы мақтау қағазымен марапатталды. Сонымен қатар, Астана қаласының 15 жылдығына арналған «Сахнадан сәлем!» атты республикалық театр фестиваліне және Павлодар қаласында өткен Қазақстанның аймақаралық театр фестиваліне қатысып, шығармашылық тәжірибесін кеңейте түсті.

2014 жылы Абай атындағы қазақ музыкалық драма театрының 80 жылдық мерейтойы аясында мәдениет саласындағы жемісті еңбегі мен жоғары кәсіби шеберлігі үшін қалалық Мәслихаттың мадақтамасымен және «Абай театрына 80 жыл» төсбелгісімен марапатталды.

Нұрбағила Чинкебаева труппа меңгерушісі қызметімен қатар, режиссерлік қырынан да кеңінен танылды. Оның сахналаған қойылымдары көрермен тарапынан жоғары бағаланып, мазмұндық тереңдігімен және көркемдік шешімімен ерекшеленді. Атап айтқанда, С.Жүнісовтің «Қысылғаннан қыз болдық» спектаклі, жергілікті автор М.Сәрсекенің «Заңды неке» комедиясы, сондай-ақ Е.Елубаевтың «Асар», Л.Симонованың «Қасиетті сөздер» атты қойылымдары оның режиссерлік ізденісінің нәтижесі болып табылады.

Сонымен бірге, Нұрбағила Чинкебаева бірқатар қойылымдардың сценарий авторы әрі режиссері ретінде де жемісті еңбек етті. Атап айтқанда:

«Аладдиннің сиқырлы шамы» (ертегі),

«Кішкентай Мукар» (ертегі),

«Ханшайым Клеопатра және Теңіз королевасы» (ертегі) спектакльдері көрерменнің зор ықыласына бөленіп, театр репертуарынан лайықты орын алды.