Қожахметов Асылбек Қожахметұлы

1940 жылғы 7 ақпан, Семей облысы Бесқарағай ауданы Өндіріс ауылы

Абай атындағы Семей кітапхана техникумы

Жазушы / журналист

Қожахметов Асылбек Қожахметұлы 1940 жылғы 7 ақпанда Семей облысы Бесқарағай ауданы Өндіріс ауылында дүниеге келген. Өндіріс ауылындағы орта мектепті бітірген соң, Семей қаласындағы Абай атындағы кітапхана техникумына оқуға түсіп, оны 1960 жылы аяқтады. Еңбек жолын Семей облыстық балалар кітапханасында әдіскер болып бастады.

1963–1968 жылдары Н.К.Крупская атындағы Семей педагогикалық институтында білім алып, қазақ тілі мен әдебиеті пәнінің мұғалімі мамандығын алды.

1962–1963 жылдары А.Қ.Қожахметов Бесқарағай ауданына қарасты «Беген» кеңшарының комсомол ұйымының хатшысы болып қызмет атқарды. Алайда отбасылық жағдайына байланысты жұмыстан шығып, Семей облысының Жарма ауданына көшіп барды. Онда орта мектепте мұғалім, «Первомайский» кеңшарының жұмысшы комитетінің төрағасы (1966–1969 жж.), Жарма аудандық «За изобилие» газетінің жауапты хатшысы (1969–1971 жж.) қызметтерін атқарды.

1971 жылы Алматы жоғары партия мектебіне оқуға түсіп, оны 1973 жылы тәмамдаған соң Жарма ауданындағы Киров атындағы кеңшардың партия комитетінің хатшысы болып тағайындалды және бұл қызметті 1977 жылға дейін атқарды.

1977 жылы Асылбек Қожахметұлы Бесқарағай ауданына қайта оралып, «Кривинский» кеңшарының партия комитетінің хатшысы болып жұмыс істеді. Бұл қызметті 1979 жылға дейін атқарды. 1979–1983 жылдары Бесқарағай аудандық «Прииртышье» газетінің редактор орынбасары болды. 1983–1989 жылдары Бесқарағай аудандық мәдениет бөлімін басқарды.

1989 жылы Бесқарағай аудандық «Шұғыла» газетінің редакторы болып тағайындалды. 1992 жылы Бесқарағай аудандық «Достық» газетінің редакторы қызметіне ауыстырылды. 1995 жылы Семей облыстық «Ертіс» газетінің редактор орынбасары, сол жылы Семей облыстық «Семей таңы» газетінің жауапты хатшысының орынбасары қызметіне ауыстырылды. 1998 жылы Бесқарағай аудандық «Бесқарағай тынысы» газетінің редакторы болып тағайындалды.

Өзінің тығыз қызметіне қарамастан, А.Қ.Қожахметов туған өлкесіне әрдайым қызығушылық танытып, болып жатқан барлық оқиғалардан хабардар болды. Оның мақалалары әрдайым кең оқырман қауымға қызықты болды.

2001 жылы А.Қожахметовтың «Берекелі өлке – Бесқарағай» атты кітабы жарық көрді. Бұл кітап очерк, повесть және әңгімелерден тұрады. «Бесқарағай кеше мен бүгін» атты тарихи очеркте Бесқарағай ауданының 1918 жылдан қазіргі уақытқа дейінгі өмірі баяндалып, ауданның дамуына әр жылдары еңбек сіңірген адамдар туралы айтылады.

«Өмір өткелдері» повесі Қазақ КСР ауыл шаруашылығы саласының еңбеккері, «Ленин» ордені мен «Октябрь революциясы» орденінің иегері, есімі Қазақ КСР-нің «Құрмет кітабына» екі рет жазылған Бутенбалин Исмагул Камзаевичтің өмір жолына арналған.

Ал «Партизан Рамазанның ерлігі» әңгімесі Кеңес Одағының Батыры Рамазан Ерғалиев туралы баяндайды.

2008 жылы «Бесқарағай белестері» атты кітап жарық көрді. Бұл еңбегін Асылбек Қожахметұлы Бесқарағай ауданының 80 жылдығына арнаған. Кітапта Бесқарағай ауданына қарасты ауылдардың тарихы мен дамуы кеңінен баяндалады, Ұлы Отан соғысы жылдарындағы тылдағы еңбек, Кеңес Одағының батырлары, Ұлы Отан соғысына қатысушылар туралы жан-жақты әңгімеленеді. Автор тың игеру кезеңіне, сол жылдардағы аудан орталығы Үлкен Владимирка (Большая-Владимировка) ауылының өміріне ерекше назар аударған.

1998 жылдан бастап А.Қ.Қожахметов Қазақстан Республикасының Журналистер одағының мүшесі болып табылады.