Сасанов Марат Еркимбекович (07.02.1971) - «Прииртышье» өлкетану қоғамының төрағасы, кәсіпкер, өнертапқыш. Қаланың қоғамдық өміріне елеулі үлес қосып келеді. Таусылмас қуаты мен туған өлкесіне деген шынайы сүйіспеншілігі оны өлкетану саласындағы нағыз көшбасшы әрі ағартушы етеді.

Марат Сасановтың «Прииртышье» қоғамын басқарған жылдары ішінде ұйым Қазақстанның үкіметтік емес секторында үлкен жетістіктер мен нәтижелерге қол жеткізді. Ол Абай облысындағы ең үздік үкіметтік емес ұйым деп танылды.

2023 жылдың қорытындысы бойынша «Прииртышье» өлкетану қоғамы Қазақстанның XI Азаматтық форумы аясында «Тарихи-мәдени мұраны сақтау» номинациясы бойынша «ТАҢДАУ» сыйлығына ие болды.

Осы номинация бойынша 2024 жылы «Прииртышье» «Волонтёр-2024» халықаралық сыйлығында елдегі ең үздік ҮЕҰ атанып, мәдениет саласындағы жетекші волонтёрлік бірлестіктердің бірі ретіндегі мәртебесін нығайтты.

Қоғам естелікті мәңгілікке қалдыру, архив деректерімен жұмыс, тарих және мәдениет ескерткіштерін қорғау, сондай-ақ Прииртышье өңірінде өлкетануды насихаттау бағытындағы қызметін белсенді түрде жалғастырып келеді.

Марат Еркімбекұлы өлкетану конференцияларын, дөңгелек үстелдерді, семинарлар мен көрмелерді ұйымдастырып, өткізуге белсенді қатысады, туған өлкенің тарихы мен өлкетану тақырыбында өңіріміз бойынша зерттеу сапарларын жүзеге асырады. Мәдени өмірдің дамуына ықпал етеді.

Марат Еркімбекұлы — өңіріміздегі көптеген археологиялық нысандардың алғашқы ашушысы: Семей геоглифі, Мұқыр аңшысы, Бұқаша қыстауы және т.б. Ол ғылыми гипотезалардың авторы: қола айна қолдану ерекшеліктері мен көне руникалық жазудың шығу тегі, тасмола археологиялық мәдениетіне тән «мұртты» қорғандардың жіктелуі мен арналымы.

2024 жылы Марат Сасанов Семей өңірі бойынша жүргізілген экспедициялар туралы очерктер жинағын жарыққа шығарды. Бұл еңбекте ол көп жылдар бойы жинаған табыстар, бақылаулар мен жеке жаңалықтар жөніндегі қызықты мәліметтермен, сондай-ақ туған өлкені зерттеудің тың әрі кейде таңғаларлық әдістерімен бөліседі.

Семей қаласының көне сәулет мұрасын қорғау бағытында да белсенді жұмыс жүргізіп келеді. Оның жетекшілігімен сәулеттік және тарихи құндылығы бар, өткен ғасырлардағы тұрмыс пен мәдениетті бейнелейтін 60 ғимаратты қамтыған көне үйлердің тізілімі жасалды. Осы тізілімдегі 29 ғимарат өлкетану қоғамының ұсынысы бойынша қорғалатын ескерткіштердің алдын ала тізіміне енгізілді.

Абай облысының бірінші шақырылымдағы қоғамдық кеңесінің мүшесі, Абай облысы Мәдениет басқармасы жанындағы тарихи-мәдени мұраны қорғау жөніндегі комиссияның мүшесі. «КПД» қауымдастығының (Қазақстандық іздестіру қозғалысы) құрылтайшысы, КСОРС мүшесі (Ресейлік отандастар ұйымдарының үйлестіру кеңесі). «AMANAT» партиясы жанындағы «Miras» азаматтық қоғам мен мәдениетті дамыту жөніндегі кеңестің мүшесі.

Абай облысының тарихи-мәдени мұрасын сақтау және насихаттау бағдарламасын әзірлеу бастамашыларының бірі, оны жүзеге асыруға белсенді қатысушы. Бағдарлама аясында «Абай облысының мектеп өлкетану жасақтары» жобасы іске асырылды. Нәтижесінде қала мен ауылдардағы оқушылардан құралған 100-ден астам жасақ құрылды. Жас зерттеушілер туған өлкені, шағын отан тарихын зерделеп, «Прииртышье» өлкетану қоғамының қамқорлығымен жергілікті жаңалықтар ашуда.